ఎస్కలేటర్ ఎక్కలేం.. లిఫ్ట్లో వెళ్లలేం..ఇగ రోడ్డు దాటేదేలా..?
- అలంకారప్రాయంగా మారిన ఫుట్ఓవర్ బ్రిడ్జిలు
- పనిచేయని లిఫ్ట్లు, ఎస్కలేటర్లు
- రాత్రయితే మందుబాబులకు అడ్డాలుగా మారిన వైనం
- ఆ జాతీయ రహదారిపై రోడ్డు దాటాలంటే ప్రతిదినం గండమే..
హైదరాబాద్, వార్తమ్యాన్(స్సెషల్ స్టోరీ) : అత్యంత రద్దీగా ఉండే రహదారులపై ప్రజలు ట్రాఫిక్ను దాటేందుకు ఫుట్ ఓవర్ బ్రిడ్జిలు ఉపయోగపడుతాయి. ప్రమాదాలు జరగకుండా ఇవి చాలా ఉపయోగపడుతాయి. హైదరాబాద్ నుండి ముంబై వెళ్లే జాతీయ రహదారి వెంట ఉన్న ఫుట్ ఓవర్ బ్రిడ్జిలు మాత్రం ప్రస్తుతం అలంకార ప్రాయంగా మారాయి. ప్రారంభించిన మొదట్లో బాగానే పనిచేశాయి. ఆ తర్వాత అధికారులు వీటి నిర్వహణ పట్టించుకోకపోవంతో అధ్వానంగా మారాయి. బ్రిడ్జి ఎక్కి దిగేందుకు ఏర్పాటు చేసిన ఎస్కలేటర్లు, లిఫ్ట్లు పనిచేయడం లేదు. కొన్ని చోట్లు లిఫ్ట్ డోర్లు విరిగిపోయి ప్రమాదకరంగా మారాయి. రాత్రి అయితే చాలు మందుబాబులకు ఈ బ్రిడ్జిలే అడ్డాలుగా మారాయి. ఫుట్ ఓవర్ బ్రిడ్జిలు పనిచేయకపోవడంతో వృద్ధులు, విద్యార్ధులు ఇతరులు ప్రాణాలు అరచేతిలో పెట్టుకొని జాతీయ రహదారిని దాటుతున్నారు. వీటి దుస్థితిపై అధికారులకు ఫిర్యాదులు చేసిన చూస్తాం.. పరిశీలిస్తాం.. మా పరిధి కాదు అంటూ తప్పించుకుంటున్నారని ప్రజలు ఆరోపిస్తున్నారు. జాతీయ రహదారిని దాటుతూ నిత్యం అనేక మంది రొడ్డు ప్రమాదాలకు గురవుతుండగా, మరికొందరూ ప్రాణాలు కోల్పోతున్నారు.
పేరుకే ఫుట్ఓవర్ బ్రిడ్జిలు..పనిచేస్తే ఒట్టు..
ముంబై జాతీయ రహదారి నగరం నుండి మియాపూర్, చందానగర్, లింగంపల్లి మీదుగా వెళ్తుంది. ఈ జాతీయ రహదారి వెంబడి ఇరువైపు వాణిజ్య సముదాయాలు, విద్యా సంస్థలు ఉన్నాయి. నిత్యం వేలాది వాహనాలు ప్రయాణించే ఈ రోడ్డులో విద్యార్ధులు, ప్రయాణికులు, ప్రజలు రోడ్డు వెంట రోడ్డు దాటేందుకు జీహెచ్ఎంసీ ఫుట్ ఓవర్ బ్రిడ్జిలు నిర్మించింది. మియాపూర్ నుండి లింగంపల్లి వరకు నాలుగు అందుబాటులో ఉన్నాయి. వీటిలో మియాపూర్ బొల్లారం చౌరస్తా, అల్విన్ క్రాస్ రోడ్డు, మదీనగూడ, గంగారం వద్ద ఫుట్ ఓవర్ బ్రిడ్జిలు ఉన్నాయి. ఒక్కొక్క దానికి కోటికి పైగానే వెచ్చించి నిర్మించారు. పాదచారులకు అందుబాటులోకి తీసుకువచ్చిన మొదట్లో బాగానే పనిచేశాయి. ఆ తర్వాత వీటి నిర్వహణను జీహెచ్ఎంసీ అధికారులు పట్టించుకోవడం మానేశారు.
పనిచేయని ఎస్కలేటర్లు, విరిగిన లిఫ్ట్ డోర్లు..
మియాపూర్ నుండి లింగంపల్లి వరకు జాతీయ రహదారి వెంబడి ఉన్న నాలుగు ఫుట్ఓవర్ బ్రిడ్జిలు నిర్వహణ లేక మూలన పడ్డాయి. వృద్ధులు, అంగవైకల్యం ఉన్న వారి కోసం రెండు వైపుల ఏర్పాటు చేసిన ఎస్కలేటర్లు, లిఫ్ట్లు పనిచేయడం లేదు. గంగారం వద్ద ఉన్న ఫుట్ ఓవర్ బ్రిడ్జికి ఒక వైపు ఉన్న లిఫ్ట్ డోర్ విరిగి పోయి ప్రమాదకరంగా ఉంది. ఎక్కడికక్కడ చెత్తాచెదారం, ఇసుకతో ఫుట్ఓవర్ బ్రిడ్జిలు అస్తవ్యస్థంగా కనిపిస్తున్నాయి. దీంతో కొందరూ పాదచారులు ముక్కు ముసుకొని ఫుట్ఓవర్ బ్రిడ్జిపై నుండి రోడ్డు దాటాల్సిన పరిస్థితి నెలకొంది.
రాత్రయితే మందుబాబులకు అడ్డా..
జాతీయ రహదారి వెంట ఉన్న ఈ ఫుట్ ఓవర్ బ్రిడ్జిలు పాదచారులకు ఉపయోగపడకపోగా మందుబాబులకు మాత్రం అడ్డాలుగా మారాయి. గంగారం వద్ద ఉన్న ఫుట్ ఓవర్ బ్రిడ్జికి సమీపంలోనే వైన్ షాప్ ఉండడంతో రాత్రి అయ్యిందంటే చాలు మందుబాబులు బ్రిడ్జిపై మద్యం తాగుతూ కనిపిస్తారు. ఫుట్ ఓవర్ బ్రిడ్జి పైనుండి వెళ్లే వారి పట్ల వేధింపులకు పాల్పడుతున్నారు. నిత్యం రద్దీగా ఉండే ఈ ప్రదేశాల్లో నిఘా ఉంచాల్సిన పోలీసులు పట్టించుకోవడం లేదనే ఆరోపణలు ఉన్నాయి. ఫుట్ ఓవర్ బ్రిడ్జిపై ఎక్కడపడితే అక్కడ మద్యం బాటిళ్లు, పగిలిపోయిన సీసాలు దర్శనమిస్తున్నాయి.
